Ferguson: Við óttumst ekki AC Milan

Sir Alex Ferguson, stjóri Manchester United, segir sína menn ekki óttast ítalska liðið AC Milan fyrir fyrri leik liðanna í undanúrslitum Meistaradeildarinnar í kvöld. Leikið verður á Old Trafford og verður leikurinn sýndur beint á sjónvarpsstöðinni Sýn.

Mikil meiðsli eru í herbúðum enska liðsins og þar er það vörnin sem er sérstaklega undirmönnuð. Ferguson hefur ekki áhyggjur af því. "Við óttumst Milan ekki þó við séum undirmannaðir og ég er ánægður með andann í hópnum. Á þessum tímapunkti á árinu er maður alltaf að líta eftir því hvort menn séu of spenntir - og þó við séum í smá meiðslavandræðum - verð ég ekki var við að menn séu kvíðnir," sagði Ferguson.