Samdráttur hjá bandarískum bílasölum

Sala á nýjum bílum dróst mikið saman í Bandaríkjunum í síðasta mánuði en salan hefur ekki verið minni í tæp tvö ár. Samdrátturin var mestur hjá bandaríska bílaframleiðandanum Ford en sala dróst saman um 12,9 prósent á milli ára.

Hátt eldsneytisverð vestanhafs og verri skuldastaða Bandaríkjamanna er sögð helsta ástæðan fyrir samdrættinum.

Samdrátturinn var hjá flestum bílaframleiðendum vestra, jafnt þarlendum sem erlendum. Undantekning var hins vegar hjá DaimlerChrysler er sala á nýjum bílum fyrirtækisins jókst um 1,2 prósent í mánuðinum.

Jafnvel Toyota, sem tók fram úr General Motors sem umsvifamesti bílaframleiðandi í heimi fyrr á árinu, horfði fram á fjögurra prósenta samdrátt. Þetta er mesti samdráttur hjá japanska bílarisanum í tvö ár.

Þá dróst sala á bílum saman hjá Honda um 1,2 prósent en Nissan um heil 11 prósent.