Saunders verður áfram með Detroit Pistons

Flip Saunders verður áfram þjálfari Detroit Pistons í NBA deildinni á næsta keppnistímabili þrátt fyrir að liðið hafi fallið úr keppni fyrir Cleveland Cavaliers í úrslitum Austurdeildarinnar á dögunum. Margir höfðu spáð því að hlutirnir yrðu stokkaðir upp í herbúðum liðsins í sumar, en þjálfarinn segir framtíð sína aldrei hafa verið í vafa.

Miklar hræringar hafa verið í þjálfaramálum í NBA síðustu daga og til að mynda hætti Billy Donovan við að taka við liði Orlando Magic og ákvað að vera áfram hjá háskólaliði Florida Gators. Hann hafði skrifað undir samning við Magic, en hætti við allt saman. Þjálfarastaðan hjá Orlando liðinu er því enn upp í loft.