Sjónvarpssamningur eyðileggur knattspyrnuveislu

Nokkur óánægja hefur verið á meðal knattspyrnuáhugamanna á Íslandi vegna ákvörðunar KSÍ að raða niður leikjum landsliða Íslands sem fara fram í dag með svo stuttu millibili. Geir Þorsteinsson, formaður KSÍ, sagði í samtali við Vísi að þeir hafi verið í vandræðum með að raða niður leikjunum.

U21 landslið Íslands leikur gegn Kýpur í Grindavík klukkan 16:00, aðeins tveimur klukkustundum áður en íslenska A-landsliðið mætir Kanada á Laugardalsvellinum. Það gerir það að verkum að þeir sem fara til Grindavíkur geta varla farið á Laugardalsvöllinn til að horfa á A-landsliðið.

„Við vorum í klemmu," sagði Geir. „Leikur Íslands og Kanada varð að fara fram á þessum tíma vegna sjónvarpssamninga sem við höfum við RÚV. Við gátum kannski haft U21 leikinn í hádeginu en þá hefði varla nokkur maður mætt vegna þess að þá eru flestir í vinnunni."