Nelson verður áfram með Warriors

Hinn þrautreyndi þjálfari Don Nelson hefur nú loksins náð samkomulagi við Golden State Warriors um að stýra því að minnsta kosti eitt ár til viðbótar. Fjölmiðlar í Kaliforníu greindu frá því í dag að Nelson fái umtalsverða launahækkun á síðustu tveimur árunum af gamla samningnum.

Árslaun Nelson fara þannig úr 3,1 milljón dollara á ári upp í 5,1 milljón, en félagið á möguleika á að segja samningnum upp eftir næsta tímabil. Nelson segist kátur yfir því að samningar séu í höfn því honum líði vel við flóann í Oakland.

Undir stjórn Nelson komst lið Warriors nokkuð óvænt í úrslitakeppnina síðasta vor og sló svo deildarmeistara Dallas út í fyrstu umferð úrslitakeppninnar. Það voru einhver óvæntustu úrslit í sögu NBA.