Matthías á leið til Svíþjóðar

Matthías Guðmundsson, leikmaður FH, er á leið til reynslu hjá sænska úrvalsdeildarliðinu GAIS.

Þetta kemur fram á fótbolti.net í dag en með GAIS leika tveir Íslendingar, þeir Eyjólfur Héðinsson og Jóhann Birnir Guðmundsson.

Matthías gekk til liðs við FH fyrir ári síðan en þar á undan hafði hann alla tíð leikið með Val. Hann skoraði átta mörk í deild og bikar með FH í sumar og var fastamaður í liðinu.

Hann var einnig valinn í landsliðið sem mætti Liechtenstein og Svíum í júní síðastliðnum og var í byrjunarliðinu í leiknum í Svíþjóð.