Eiður missti næstum af fluginu

Eiður Smári Guðjohnsen var nærri búinn að missa af fluginu til Glasgow með félögum sínum í Barcelona ef marka má fréttir í spænskum miðlum í dag.

Eiður mun væntanlega fá tækifæri í byrjunarliðinu í kvöld vegna mikilla meiðsla í herbúðum liðsins, en hann var næstum búinn að missa af ferðinni til Skotlands af því hann gleymdi vegabréfinu sínu heima.

Það var hinsvegar konan hans sem reddaði málunum með því að bruna heim og sækja vegabréfið, en þá var allt liðið löngu komið út í flugvél og tilbúið að leggja af stað.