Benitez: Við komumst áfram

Rafael Benitez er handviss um að sínir menn komist áfram í 16-liða úrslit Meistaradeildarinnar þó svo að liðið sé aðeins með eitt stig eftir þrjá fyrstu leikina í riðlakeppninni.

Liðið tapaði í kvöld fyrir Besiktas í Tyrklandi, 2-1. 

„Ef við spilum eins og við gerðum í kvöld getum við sannarlega komist áfram,“ sagði Benitez sem sagði að sínir menn hefðu stjórnað leiknum í kvöld.

„Nú verðum við að byrja að hugsa um næsta leik og reyna að vinna hanna. Við sköpuðum okkur mörg færi í kvöld og stjórnuðum næstum öllum leiknum.“

Hann segir að mistök í fyrri hálfleik hafi reynst dýrkeypt og að Liverpool hefði þurft að skora fyrir leikhléið.

„Við stjórnuðum leiknum í seinni hálfleik og þeir fengu ekki nema tvö færi seint í leiknum. Þegar maður stjórnar leiknum eins og við gerðum í kvöld verður maður bara að halda áfram og reyna það sama.“