Sama sagan hjá Dudek

Pólski markvörðurinn Jerzy Dudek hjá Real Madrid segist líklega þurfa að fara frá félaginu ef hann ætli sér að eiga von um að spila með landsliði sínu á EM næsta sumar.

Dudek fór frá Liverpool einmitt vegna þess að hann var alltaf varamaður en finnur sig vitanlega í nákvæmlega sömu stöðu hjá Real Madrid þar sem hann er varamaður eins besta markvarðar heims - Iker Caslillas.

Hann segist þó ekki sjá eftir því að hafa ákveðið að fara til Spánar.

"Ég sé ekki eftir því að koma hingað," sagði hann í samtali við Marca. "Þegar ég ákvað að fara til Madrid, var sú ákvörðun byggð á því að mig langaði að vera partur af besta félagi í heimi og að ég yrði varamaður. Aðstæður mínar hafa hinsvegar breyst nokkuð undanfarið af því pólska landsliðið er komið á EM í fyrsta sinn og landsliðsþjálfarinn hefur sagt mér að ég sé inni í myndinni hjá honum ef ég fæ að spila reglulega með félagsliði mínu. Ég er því kominn í erfiða stöðu og hef ekki hugsað um annað síðustu vikuna," sagði markvörðurinn.