Eiður Smári í hópnum

Eiður Smári Guðjohnsen er að venju í leikmannahópi Barcelona en liðið mætir Stuttgart í Meistaradeild Evrópu í kvöld.

Leikurinn hefur þó enga þýðingu þar sem Barcelona er búið að tryggja sér sigur í E-riðli keppninnar og ljóst að Stuttgart á engan möguleika á að koma sér upp úr botnsæti riðilsins.

Óljóst er hvort að Frank Rijkaard ætlar að stilla upp sínu sterkasta liði í kvöld en nokkrir leikmenn eru fjarverandi vegna meiðsla. Það eru þeir Gianluca Zambrotta, Santi Ezquerro, Oleguer Presas, Thierry Henry og Edmílson. Lionel Messi tekur svo út leikbann í leiknum í kvöld.

Yaya Toure verður hins vegar í leikmannahópnum í kvöld en hann missti af síðasta leik Barcelona vegna veikinda, sem og varnarmaðurinn Eric Abidal.

Deco, Andrés Iniesta og Xavi eru á sínum stað í hópnum sem og sóknarmennirnir Bojan Krkic, Giovani Dos Santos, Ronaldinho og Samuel Eto'o.