Vilja gera Culio að rúmenskum ríkisborgara

Juan Culio var hetja rúmenska liðsins CFR Cluj er hann skoraði bæði mörkin í 2-1 sigri liðsins á AS Roma í Meistaradeild Evrópu í gær.

Mircea Sandu, formaður rúmenska knattspyrnusambandsins, hefur nú sett sig í samband við yfirvöld þar í landi til að hvetja þau til að gefa þeim leikmönnum sem standa sig vel rúmenskan ríkisborgararétt. Frammistaða Culio í gær hefur gert þær raddir enn háværri í Rúmeníu.

Culio er 25 ára miðjumaður frá Argentínu sem ólst upp við bágborin skilyrði í heimalandi sínu. Hann vann í byggingarvinnu frá þrettán ára aldri til að afla fjölskyldu sinni tekjur. Hann ólst upp í borginni Mercedes sem er rétt sunnan við Buenos Aires en hafði ekki efni á að ferðast til höfuðborgarinnar til að spila þar.

Þegar hann var nítján ára gamall var hann uppgötvaður af útsendara er hann spilaði á götum úti í heimabæ sínum. Hann mætti á æfingar hjá 3. deildarliðinu CS Deportivo Flandria daginn eftir.

Culio gekk svo til liðs við Cluj frá félagsliði í Chile í fyrra og hefur áður lýst yfir áhuga sínum að gerast rúmenskur ríkisborgari. Hann sá ekki eftir því að fara þangað.

„Þetta var stórt stökk fyrir mig en ég er ánægður að ég tók það," sagði hann.

Rúmenskir fjölmiðlar voru í sigurvímu eftir leikinn og lofuðu þá sérstaklega frammistöðu Culio í bak og fyrir.