Hildebrand farinn frá Valencia

Valencia hefur komist að samkomulagi við þýska markvörðinn Timo Hildebrand um að rifta samningi hans við félagið. Er hann því laus allra mála.

Hildebrand hefur ekki komið við sögu hjá liði félagsins í langan tíma en síðan að Unai Emery tók við knattspyrnustjórn liðsins hefur Brasilíumaðurinn Renan staðið vaktina í marki Valencia. Oft hefur Hildebrand ekki komist í leikmannahóp félagsins.

Hildebrand vildi því ólmur fara frá félaginu og er nú frjálst að leita annað. Hann fór frá Stuttgart til Valencia árið 2007 og var samningsbundinn félaginu til 2010.