Hollendingar kaupa Hníf Abrahams

„Fyrsta spennusaga Óttars M. Norðfjörð, Hnífur Abrahams, hefur verið seld til Hollands. Er það hollenska spennusagnaforlagið Verbum Crime sem hefur tryggt sér útgáfuréttinn og er þýðingarvinna langt komin," segir Tómas Hermannsson útgefandi hjá Sögur forlagi.

Hnífur Abrahams hlaut góðar viðtökur í fyrra þegar hún kom út hér á landi en rauður þráður bókarinnar er trúardeilur múslima og kristinna. „Já, þeir hjá Verbum Crime horfa ekki síst til þess og binda nokkrar vonir við að skáldsagan muni hitta í mark því þetta hefur verið ofarlega á baugi í Hollandi, eða allt frá því að leikstjórinn Theo Van Gogh var myrtur árið 2004 eftir sýningu myndar hans um Kóraninn."

Mynd van Goghs, „Auðmýkt", var um íslam og konur og vakti mikla gremju meðal múslima í Hollandi þegar hún var sýnd í sjónvarpi. Tómas gerir vitaskuld ekki ráð fyrir sambærilegum viðbrögðum við Hnífi Abrahams en telur hana ótvírætt innlegg í umræðuna. „Þá hefur Verbum Crime einnig sýnt nýrri spennusögu Óttars áhuga, en hún nefnist Sólkross, er sjálfstætt framhald Hnífs Abrahams og kom út fyrir fáeinum dögum."

- jbg