Gunnar Heiðar með launahæstu leikmönnum Esbjerg

Eftir því sem kemur fram í þýskum fjölmiðlum í dag var Gunnar Heiðar Þorvaldsson seldur frá þýska félaginu Hannover 96 til Esbjerg í Danmörku fyrir 25 milljónir króna.

Um er að ræða talsvert lægri upphæð en Hannover greiddi fyrir hann á sínum tíma. Hins vegar hefur Vísir heimildir fyrir því að félagið hafi ekki séð sér annan kost en að selja Gunnar Heiðar enda nýbúið að festa kaup á finnska framherjanum Mikael Forssell.

Gunnar Heiðar heldur að stærstum hluta þeim launum sem hann fékk í Þýskalandi og verður því með launahæstu leikmönnum félagsins í Esbjerg samkvæmt sömu heimildum.

Gunnar Heiðar gengst undir læknisskoðun hjá Esbjerg í dag og skrifar væntanlega undir samning við félagið eftir það.