Form og fólk í svarthvítu

Sýningin Formstaklingar verður opnuð í Skotinu í Ljósmyndasafni Reykjavíkur á morgun. Á sýningunni má sjá ljósmyndir Klængs Gunnarssonar, en á þeim eru form og línur, ljós og skuggar og manneskjur í forgrunni.

Klængur hefur lagt stund á ljósmyndun í nokkur ár og fer helst ekki út úr húsi án myndavélarinnar. Hann tók myndirnar á sýningunni Formstaklingar á ferðum sínum um framandi heimshluta, meðal annars Asíu og Suður-Ameríku. Hann segir þó myndirnar ekki til þess gerðar að miðla upplifun hans af þessum menningarheimum.

„Þungamiðjan í þessum myndum er ekki endilega lífið í þessum löndum heldur endurspegla þær einfaldlega það sem hefur helst vakið áhuga minn við ljósmyndun undanfarin ár, en það eru myndir af formum og ljósi og skugga. Ég lagði ekki upp með það á sínum tíma að taka myndir sem síðan enduðu á sýningu, heldur varð sýningin frekar til eftir á þegar ég tók eftir því að margar myndanna sem ég hafði tekið á ferðum mínum innihéldu áhugaverð form og svo einn einstakling einhvers staðar í rammanum. Út frá því varð til hugmyndin að þessarri sýningu og svo náttúrulega titillinn, Form­staklingar.“

Ljósmyndir Klængs eru allar svarthvítar og segist hann sjaldan vinna með litmyndir. „Svarthvítar myndir heilla mig meira af einhverri ástæðu; líklega vegna þess að þær geta dregið fram einfaldleikann í mynd­efninu. Sterkir litfletir eiga það til að grípa alla athygli manns í litmyndum, en í svart-hvítum myndum fær myndefnið og myndbyggingin að njóta sín til fulls.“

Klængur hefur haldið einkasýningar á ljósmyndum sínum áður, meðal annars á menningarnótt árin 2005 og 2006, og er meira sýningarhald framundan hjá honum. „Ég er að fara að opna listasal á Skólavörðustíg í samvinnu við nokkra félaga mína nú í byrjun ágúst, en þar mun ég sýna ljósmyndir mínar auk þess sem við munum einnig sýna margs konar aðra list. Einnig verður opnuð sýning á ljósmyndum eftir mig í Hljómskálagarðinum á menningarnótt,“ segir atorkusami ljósmyndarinn Klængur.

Sýningin Formstaklingar stendur í Ljósmyndasafni Reykjavíkur, Tryggvagötu 15, fram til 23. september. vigdis@frettabladid.is