Popovich framlengir við Spurs

Þjálfarinn Gregg Popovich hefur samþykkt að framlengja samning sinn við meistara San Antonio Spurs út leiktíðina 2011-12. San Antonio Express News greindi frá þessu í gær.

Eigandi félagsins segist hafa tekið í höndina á Popovich og segir að þegar maður eins og Popovich sé annars vegar, þýði það að samningar séu í höfn.

"Hann er búinn að samþykkja að framlengja við okkur en hefur ekki fengið mér pappírana undirritaða ennþá. Hann segist vera of upptekinn," sagði eigandinn.

Popovich stendur í ströngu með liði sínu í úrslitakeppninni þar sem meistararnir eru komnir 2-0 undir gegn LA Lakers í úrslitum Vesturdeildarinnar.