Benzema hrifinn af Real Madrid

Franski landsliðsmaðurinn Karim Benzema hefur gefið til kynna að það myndi vekja áhuga hans að spila með Real Madrid í framtíðinni.

Sjálfur segir hann þó mikilvægt að vera áfram í Frakklandi þar sem hann leikur með Lyon.

„Ég er hrifinn af Real Madrid en ég held að ég sé enn of ungur fyrir svo stórt félag. Ég þarf að öðlast meiri reynslu og ég myndi gjarnan vilja hjálpa Lyon að verða Evrópumeistari," sagði Benzema.

„Við skulum svo sjá til í framtíðinni," bætti hann við.

Benzema skrifaði í vetur undir nýjan samning við Lyon sem gildir til loka tímabilsins 2013. Hann hefur sterklega verið orðaður við Manchester United á undanförnum misserum.