Riley íhugar að hætta þjálfun

Pat Riley, þjálfari Miami Heat í NBA deildinni, útilokar ekki að hætta þjálfun að loknu yfirstandandi keppnistímabili. Riley er líka forseti Heat en er reyndar með samning sem þjálfari út leiktíðina 2010.

Riley lét hafa eftir sér að kannski væri það félaginu fyrir bestu ef hann hætti í vor, en segir þó ekkert ákveðið í þeim efnum.

Miami hefur gengið afleitlega í vetur og er liðið í neðsta sæti í Austurdeildinni - aðeins tveimur árum eftir að liðið varð NBA meistari.

Annars er það að frétta af Miami-liðinu að meiðsli miðherjans Shaquille O´Neal sem hafa haldið honum frá keppni í síðustu sex leikjum voru ekki eins alvarleg og talið var í fyrstu. Hann er væntanlegur aftur til æfinga í næstu viku.