Coleman hættur hjá Sociedad

Chris Coleman hefur sagt starfi sínu lausu sem knattspyrnustjóri spænska B-deildarliðsins Real Sociedad.

Fyrir aðeins viku síðan sagði Coleman að hann myndi verða um kyrrt hjá félaginu eftir að hann fundaði með nýjum forseta félagsins, Inako Badiola.

Steven Kean, aðstoðarmaður Coleman, er einnig hættur en þeir skrifuðu báðir undir þriggja ára samning við félagið í sumar.

Framtíð Coleman hefur verið í mikilli óvissu síðan að Badiola var kjörinn forseti félagisins fyrr í mánuðinum. Coleman sagði að hlutirnir hefðu breyst með tilkomu Badiola og að þeir deildu ekki sömu sýn hvernig reka ætti knattspyrnufélag.