Snæfell í bikarúrslitin

Snæfell tryggði sér í dag sæti í úrslitum Lýsingarbikarsins í körfubolta þegar liðið skellti Njarðvík örugglega í Ljónagryfjunni 94-77.

Justin Shouse var stigahæstur í liði Snæfells með 27 stig, Hlynur Bæringsson skoraði 19 stig og hirti 19 fráköst og Sigurður Þorvaldsson skoraði 15 stig. 

Damon Bailey var atkvæðamestur hjá Njarðvík með 26 stig og 10 fráköst, Brenton Birmingham skoraði 16 stig og Hörður Axel Vilhjálmsson 14.

Njarðvíkingar hittu aðeins úr 7 af 27 þriggja stiga skotum sínum í leiknum (26%) á meðan gestirnir hittu úr 11 af 19 langskotum sínum (58%). 

Snæfell mætir annað hvort grönnum sínum Skallagrími eða Fjölni í úrslitum keppninnar en ljóst er að nýtt nafn verður skráð á bikarinn að þessu sinni eftir að Njarðvíkingar féllu úr leik.

Skallagrímur mætir Fjölni í Borgarnesi annað kvöld klukkan 19:15.

Umfjöllun um leik Njarðvíkur og Snæfells kemur hér á Vísi snemma í fyrramálið.