McGrady stal senunni í kínverska Superbowl

Um 200 milljónir Kínverja eru sagðar hafa fylgst með í stjónvarpi í nótt þegar Milwaukee Bucks mætti Houston Rockets í NBA deildinni - í leik sem fékk nafnið kínverski Superbowl.

Kínversku landsliðsmennirnir Yao Ming hjá Houston og Yi Jianlian hjá Milwaukee áttust þarna við með liðum sínum í síðari einvígi liðanna af tveimur í vetur - Eða Yi gegn Yao II.

Talið er að um 200 milljónir hafi séð leikinn í sjónvarpi í Kína, eða allt að helmingi fleiri en sjá leikinn um Ofurskálina í NFL deildinni í kvöld.

Hvorugur Kínverjanna náði sér á strik í leiknum í nótt en þess í stað var það Tracy McGrady sem stal senunni og skoraði 33 stig fyrir Houston í 91-83 sigri. Andrew Bogut skoraði 21 stig fyrir Milwaukee.

Atlanta lagði New Jers3ey 104-92 þar sem Marvin Williams skoraði 24 stig fyrir Atlanta en Richard Jefferson skoraði 23 stig fyrir New Jersey.

Orlando lagði Indiana á útivelli 121-115. Dwight Howard skoraði 24 stig og hirti 12 fráköst fyrir Orlando en Danny Granger skoraði 29 stig fyrir Indiana.

Cleveland vann auðveldan sigur á meiðslum hrjáðu liði LA Clippers 98-84. LeBron James skoraði 28 stig, hirti 11 fráköst og gaf 7 stoðsendingar fyrir Cleveland en Al Thornton skoraði 23 stig og hirti 7 fráköst fyrir Clippers.

Utah vann nokkuð auðveldan sigur á undirmönnuðu liði Memphis 110-91 í fyrsta leik Memphis án Pau Gasol sem er á leið til LA Lakers. Carlos Boozer skoraði 19 stig fyrir Utah og Rudy Gay 15 fyrir Memphis.

Denver naut krafta Carmelo Anthony á ný þegar liðið lagði Charlotte heima 117-101. Jason Richardson skoraði 38 stig fyrir Charlotte og Anthony skoraði 25 stig og hirti 10 fráköst fyrir Denver.

Sacramento vann nauman heimasigur á Chicago 105-101 þar sem Ron Artest skoraði 28 stig fyrir Sacramento, Kevin Martin 26 og miðherjinn Brad Miller skoraði 22 stig og hirti 20 fráköst gegn sínum gömlu félögum. Ben Gordon var stigahæstur hjá Chicago með 33 stig.

Þá vann Seattle þriðja leikinn í röð í fyrsta skipti í vetur þegar það lagði New York á heimavelli sínum 86-85. Kevin Durant skoraði 21 stig fyrir Seattle en Zach Randolph 24 fyrir New York.