Eiður Smári tekinn út af á 24. mínútu

Frank Rijkaard, stjóri Barcelona, tók Eið Smára Guðjohnsen af velli strax á 24. mínútu í leik Real Madrid og Barcelona sem nú stendur yfir.

Real Madrid komst 2-0 yfir á þessum tíma. Fyrst skoraði Raul með glæsilegu skoti og stuttu síðar Arjen Robben með skalla eftir fyrirgjöf Guti úr aukaspyrnu.

Það bar ekki mikið á Eiði Smára þessar fyrstu mínútur leiksins frekar en öðrum leikmönnum Barcelona.

Spænskir fjölmiðlar telja að Eiður Smári verði einn þeirra leikmanna sem muni fara frá liðinu í sumar og því gæti verið að þetta hafi verið síðasti leikur hans með Barcelona en aðeins tveir leikir eru eftir á tímabilinu.