Pique genginn til liðs við Barcelona

Varnarmaðurinn Gerard Pique hefur gengið til liðs við Barcelona og skrifað undir fjögurra ára samning við félagið.

Manchester United og Barcelona hafa komist að samkomulagi um kaupverð en Pique átti eitt ár eftir af samningi sínum við United sem hann undirritaði árið 2004 er hann kom frá Barcelona.

Pique hefur fá tækifæri fengið hjá United þar sem Rio Ferdinand og Nemanja Vidic hafa átt fast sæti í byrjunarliði félagsins. Pique var þó lánaður til Real Zaragoza og lék hann í vörn liðsins tímabilið 2006-7.

Börsungar hafa nú gengið frá kaupum á tveimur leikmönnum eftir að tímabillinu lauk en í gær var gengið frá samningum við miðvallarleikmanninn Seydou Keita frá Sevilla.