KR burstaði Keflavík

KR-ingar eru komnir í undanúrslitin í Subway bikarnum í körfubolta eftir stórsigur á Íslandsmeisturum Keflavíkur á heimavelli í kvöld, 95-64.

KR-ingar voru undir að loknum fyrsta leikhluta gegn Keflavík, í DHL-höllinni í vesturbænum í kvöld.

Þá tók Jón Arnór Stefánsson til sinna ráða, skoraði þrjár þriggja stiga körfur í röð og tróð með tilþrifum og kveikti í troðfullu húsi áhorfenda.

"Ég varð að gera eitthvað, ég var búinn að vera svo lélegur," sagði Jón Arnór glettinn í samtali við Vísi eftir leikinn, en tilþrif hans fengu áhorfendur til að rísa úr sætum og klappa.

Keflavík byrjaði leikinn af krafti, spilaði góða vörn sem virtist slá KR út af laginu og hafði yfir 22-14 eftir fyrsta leikhluta. Þá tók Jón Arnór við og tryggði að KR vann annan stórsigurinn á Keflavík í vesturbænum í vetur.

"Við vorum eitthvað spenntir þarna í byrjun, en um leið og við byrjuðum að spila grimma vörn og keyra hraðaupphlaup - spila okkar leik - kom þetta allt saman hjá okkur," sagði landsliðsmaðurinn.

Jón Arnór skoraði 20 stig, gaf 8 stoðsendingar og hirti 6 fráköst í leiknum. Jason Dourisseau skoraði 20 stig og hirti 9 fráköst og Fannar Ólafsson stóð sig vel í slagnum við Sigurð Þorsteinsson í teignum og skoraði 16 stig og hirti 9 fráköst.

Sigurður Þorsteinsson var atkvæðamestur hjá Keflavík með 17 stig, 12 fráköst og 6 varin skot, en hann lenti snemma í villuvandræðum líkt og Jón Nordal Hafsteinsson sem skoraði 12 stig, en fékk tvær villur á fyrstu 40 sekúndum leiksins.

Skotsýning hjá Stjörnunni

Stjarnan er sömuleiðis komin í undanúrslit bikarsins eftir stórsigur á Val í kvöld 116-70. Justin Shouse skoraði 28 stig fyrir Stjörnuna og Kjartan Atli Kjartansson 21, en Stjörnumenn skoruðu 19 þrista í leiknum úr 27 tilraunum.

Hjalti Friðriksson og Gylfi Geirsson skoruðu 16 stig hvor fyrir Val.

Grindavík og ÍR eigast við í Grindavík annað kvöld.