Helstu félagaskipti kvöldsins

Félagaskiptaglugginn lokaði í Evrópu í kvöld og var því nóg að gera í félagaskiptum víða um álfuna. Reyndar lokar félagaskiptaglugginn í Englandi ekki fyrr en á morgun þar sem frídagur er í Bretlandi í dag.

Þetta á þó aðeins við félagaskipti innan Bretlands og ekki fyrir leikmenn sem eru á leið til eða frá félögum í Bretlandi. Sá gluggi lokaðist einnig í kvöld.

Helstu tíðindi kvöldsins fyrir okkur Íslendinga var að Eiður Smári Guðjohnsen samdi við franska úrvalsdeildarfélagið AS Monaco til næstu tveggja ára.

Sunderland fékk varnarmanninn Michael Turner frá Hull en hann skrifaði undir fjögurra ára samning í kvöld. Kaupverðið er óuppgefið.

Real Madrid keypti hinn nítján ára gamla sóknarmann Jose Luis Mato, betur þekktan sem Joselu, frá Celta Vigo. Real ákvað að lána hann strax aftur til Celta Vigo út leiktíðina og kemur hann því ekki til Santiago Bernabeu fyrr en um næsta sumar.

Wolves keypti hinn austurríska Stefan Maierhofer frá Rapíd Vín í Austurríki. Hann skrifaði undir þriggja ára samning við Wolves í kvöld.

Juventus hefur gengið frá kaupum á Fabio Grosso frá Lyon. Grosso skrifaði undir þriggja ára samning við Juve í kvöld sem greiðir 2,9 milljónir evra fyrir kappann.

Stoke City keypti Úrúgvæann Diego Arismendi frá Club Nacional í kvöld og gerði við hann fjögurra ára samning. Stoke greiðir upphaflega þrjár milljónir evra fyrir kappann en sú upphæð gæti hækkað í 5,5 milljónir eftir ákveðinn tíma.

Getafe hefur komist að samkomulagi við Real Madrid um kaup á sóknarmanninum Miguel Torres. Hann er sagður hafa skrifað undir fimm ára samning við Getafe en hann leikur sem bakvörður. Torres var leyft að fara frá félaginu eftir að Real keypti Alvaro Arbeloa frá Liverpool fyrr í sumar.