KA/Þór og Stjarnan í undanúrslit

Tveir leikir voru í átta liða úrslitum Eimskips-bikars kvenna í handbolta í kvöld. KA/Þór og Stjarnan tryggðu sér sæti í undanúrslitum keppninnar.

Akureyrarliðið leikur í 2. deild en Grótta er í sjöunda og næst neðsta sæti N1-deildarinnar. Það kom þó ekki í veg fyrir sigur KA/Þórs sem vann 22-21 í KA-heimilinu í kvöld.

Stjarnan gerði góða ferð á Hlíðarenda og vann útisigur á Val 28-23. Stjörnustúlkur voru einu marki yfir í hálfleik og voru með leikinn í sínum höndum í seinni hálfleiknum.

Hinir tveir leikirnir í átta liða úrslitum verða á miðvikudagskvöld. FH tekur á móti Fram klukkan 19:30 og hálftíma síðar verður flautað til leiks Fylkis og Hauka í Árbænum.