Ancelotti vill frekar mæta Inter en AC Milan

Carlo Ancelotti, stjóri Chelsea, er ekki spenntur fyrir því að mæta sínum gömlu lærisveinum í AC Milan í sextán liða úrslitum Meistaradeildarinnar. Hann segist frekar kjósa að dragast gegn Ítalíumeisturum Inter.

„Ég myndi gjarna vilja sleppa við að mæta Milan því það yrði tilfinningalega of erfitt. Inter er samt sterkasta liðið sem við getum mætt. Þeir eru með frábært lið og Balotelli er mikið efni," sagði Ancelotti.

Bæði Mílanóliðin lentu í öðru sæti í sínum riðli og geta því dregist gegn Chelsea sem vann sinn riðil.