Met hjá Þorbergi í Laugavegshlaupinu

Þorbergur Ingi Jónsson, 26 ára ÍR-ingur, setti nýtt met í Laugavegshlaupinu sem fór fram í gær á milli Landmannalauga og Þórsmerkur. Þorbergur kom í mark á tímanum 4 klukkustundir og 20 mínútur en gamla metið átti Bandaríkjamaðurinn Charles Hubbard og var það 4 klukkustundir og 39 mínútur.

Sigurvegarinn í kvennaflokki, Hólmfríður Vala Svavarsdóttir, var mjög nálægt því að slá metið í kvennaflokki og bætti persónulegan árangur sinn um hálftíma en í fyrra hljóp hún á 6:03:50.

Hlaupið var ræst í Landmannalaugum í gær kl. 9.00. Alls lögðu 321 hlaupari af stað, þar af 59 erlendir þátttakendur. Veðrið var mjög gott í Landmannalaugum, sól öðru hvoru og hægur vindur. Á leiðinni voru hlauparar hinsvegar ekki eins heppnir með veður og lentu þeir meðal annars í snjókomu. Í Þórsmörk var rigning og hæglætis veður.

Af þessum 321 hlaupara sem lögðu af af stað frá Landmannalaugum þá náðu 313 að koma í mark. Einungis átta þurftu að stoppa á leiðinni sem er mjög lítill fjöldi miðað við oft áður. Aldrei hafa fleiri tekið þátt í og lokið Laugavegshlaupinu sem nú var haldið í 13.sinn.

Fyrstu karlar í mark

1. Þorbergur Ingi Jónsson, ÍSL, 4:20:32 (1982)

2. Guðmundur Sigurðsson, ÍSL, 4:54:15 (1960)

3. Tuomas Veli Tapio Maisala, FIN, 5:03:43 (1976)

Fyrstu konur í mark

1. Hólmfríður Vala Svavarsdóttir, ÍSL, 5:33:10 (1974)

2. Ásdís Söebeck Kristjánsdóttir, ÍSL, 5:36:15 (1967)

3. Rakel Ingólfsdóttir, ÍSL, 5:49:59 (1985)