Einar Andri: Hafði alltaf trú á því að við myndum vinna

„Ég er fyrst og fremst ánægður með karakterinn sem við sýndum í leiknum. Við vorum annars sjálfum okkur verstir sóknarlega en ræddum það í leikhlénu sem við tókum þegar tíu mínúturu voru eftir að við værum alltaf með í leiknum á meðan við vorum að spila góða vörn.

Við erum bara þannig lið að við getum skorað fjögur eða fimm mörk á skömmum tíma þegar þetta smellur hjá okkur og það gekk sem betur fer upp í kvöld," sagði Einar Andri Einarsson, þjálfari FH, eftir ótrúlegan 25-24 sigur gegn Fram í N1-deild karla í handbolta í Kaplakrika í kvöld.

Einar Andri hrósaði sérstaklega markverðinu Pálmari Péturssyni sem átti frábæran leik og varði 25 skot þar af þrjú víti og steig heldur betur upp á lokakaflanum.

„Palli er mikill stemnings maður og mikill karakter og ég vissi einhvern veginn að hann myndi verja vítakastið þarna í lokin og svo dauðafærið á lokamínútunni. Ég hafði alltaf trú á því að við myndum vinna leikinn og þvílíkur endir sem þetta var á þessum leik," sagði Einar Andri en Bjarki Sigurðsson tryggði FH sigur í leiknum með marki úr vítakasti á lokasekúndunni.