Sverre kom af spítalanum í leikinn

Landsliðskappanum Sverre Jakobssyni var létt í leikslok. Hann var með ellefu mánaða gamalt barn sitt á spítala skömmu fyrir leik og kom af spítalanum beint í leikinn.

„Það er sem betur fer allt í lagi með barnið. Um leið og ég vissi að allt var í lagi gat ég farið að hugsa um leikinn en það tók smá tíma að hreinsa hugann," sagði Sverre brosmildur sem fyrr en hann átti stórleik í HK-vörninni.

„Eini munurinn núna og síðast er að við höfðum meiri trú á okkur. Það skilaði okkur sigri. Vörnin var svo frábær og markvarslan geðveik. Það er alveg lífsnauðsynlegt í svona úrslitakeppni," sagði Sverre.

HK hefur gengið vel með Valí Digranesi í vetur en hefur líkt og öðrum liðum ekki tekist að sigra í Vodafonehöllinni.

„Það þarf lítið kraftaverk virðist vera en ég ásamt fleiri HK-mönnum trúi á kraftaverk. Við munum selja okkur dýrt þar," sagði Sverre sem vildi sérstaklega hrósa dómaraparinu fyrir góða frammistöðu en þeir Anton Gylfi Pálsson og Hlynur Leifsson áttu stjörnuleik með flautuna.