Eto´o útilokar að fara til Englands

Stjarna Barcelona, Samuel Eto´o, hefur útilokað að ganga í raðir félags á Englandi en Chelsea, Man. City og Liverpool hafa öll sýnt honum áhuga.

„Má ég spyrja ykkur að einu? Ef þið væruð að spila með þessu Barcelona-liði og miðað við hvernig það spilar hefðuð þíð áhuga á að spila einhvers staðar annars staðar," sagði Eto´o við blaðamenn.

„Ef þið spáið aðeins í spurningunni þá fáið þið lógískt svar. Samt til að hafa hlutina á hreinu þá hef ég engan áhuga á því að fara frá Barcelona. Við erum með bestu sóknarlínuna í heiminum og það er heiður að spila í liði með slíka hæfileika innanborðs.

„Ég er ánægður með hvað ég skora mikið og geri mér grein fyrir því að ég myndi ekki skora svona mikið án aðstoðar minna hæfileikaríku félaga. Ég fæ hreint ótrúlega þjónustu fyrir framan markið og við spilum án ótta.

„Margir leikmanna þessa liðs verða meðal þeirra bestu í sögunni og stundum þarf maður að setjast niður og hugsa hversu sérstakt þetta lið er í raun og vera," sagði Eto´o.