Gunnleifur: Ég ber ábyrgð á marki Noregs

Gunnleifur Gunnleifsson, markvörður Íslands, var ekki sáttur við niðurstöðuna úr leiknum gegn Noregi í kvöld. „Við áttum að vinna þennan leik enda miklu betra liðið allan tímann," sagði Gunnleifur.

„Við áttum að vinna þennan leik stórt. Þjálfararnir undirbjuggu okkur vel fyrir leikinn og við vorum með norska liðið alveg kortlagt. Við vissum vel hvað þeir ætluðu að gera. Þeir áttu ekki smugu á meðan við vorum ákveðnir að vinna síðasta leikinn í riðlinum, við vorum nálægt því."

Norðmenn komust yfir í leiknum með marki úr aukaspyrnu. „Hann skýtur í hornið mitt svo ég ber ábyrgð á því. Þetta var erfitt skot, boltinn sveif til hægri og vinstri," sagði Gunnleifur.

Gunnleifur segist ákveðinn í að halda sæti sínu sem aðalmarkvörður landsliðsins. „Fyrir mér er íslenska landsliðið toppurinn á öllu og ég er mjög stoltur af því að vera hluti af því. Það hefur gengið sæmilega vel og ég stefni ótrauður á að halda áfram."

En telur Gunnleifur að hann geti haldið sæti sínu í liðinu ef hann heldur áfram að spila með HK? „Ég er í HK dag en við verðum bara að sjá hvað framtíðin ber í skauti sér. Maður veit aldrei hvað gerist."