Alves feginn að hafa ekki farið til Chelsea

Brasilíski bakvörðurinn Dani Alves hjá Barcelona segist vera dauðfeginn að hafa ekki samið við Chelsea á sínum tíma og frekar farið til Barcelona.

„Ég var mjög nálægt því að semja við Chelsea en sem betur fer gerðist það ekki og ég fór til liðs sem hentar mér fullkomlega," sagði Alves.

Barcelona greiddi Sevilla 23,5 milljónir punda fyrir þennan magnaða bakvörð.

„Ég er alveg viss um að fólk mun fá eitthvað að tala um eftir leikina við Chelsea. Við erum skrefi nær okkar takmarki sem er að komast í úrslitaleikinn í Róm. Það verður ekki auðvelt fyrir Chelsea að komast í gegnum Barcelona," sagði Alves.