Kuyt vill hefnd

Dirk Kuyt, leikmaður Liverpool, vill að liðið hefni fyrir tapleikinn heimavelli er Liverpool mætir Lyon í Meistaradeild Evrópu í Frakklandi í kvöld.

Möguleikar Liverpool á að komast áfram í 16-liða úrslit tapi liðið í kvöld eru ekki miklar. Því er leikurinn gríðarlega mikilvægur.

„Vil ég hefnd? Auðvtaið vil ég hefnd. Þetta er leikur sem við verðum að vinna," sagði Kuyt við enska fjölmiðla. „Lyon er með gott lið með marga góða leikmenn í sínum röðum en við höfum áður unnið sterk lið á útivelli."

„Á undanförnum árum höfum við sigrað Marseille, Real Madrid, Barcelona og Inter Milan á útivelli og höfum ekkert að óttast gegn Lyon."

„Það má vel vera að margir hafi afskrifað okkur en það skiptir engu hvað fólk segir um okkur. Við þurfum að vinna alla þá þrjá leiki sem við eigum eftir og munum við aldrei gefast upp."