Stelpurnar mæta Svíum aftur í úrslitakeppni EM

Íslenska stúlknalandsliðið lenti í riðli með Englandi, Noregi og Svíþjóð þegar dregið var í riðla í úrslitakeppni EM hjá 19 ára landsliðum kvenna í Hvíta-Rússlandi í kvöld.

Íslensku stelpurnar ættu að þekkja ágætlega til sænska liðsins en þjóðirnar léku saman í milliriðli í Póllandi í apríl. Leiknum þá lauk með markalausu jafntefli.

Tvö efstu lið hvers riðils komast í undanúrslit og tryggja sé í leiðinni þátttökurétt á HM U20 2010 sem leikin verður í Þýskalandi.

Ef Þjóðverjar verða einu af fjórum efstu sætunum þá verður leikið sérstaklega um 5. sæti keppninnar en það sæti gefur þá einnig sæti á HM U20 í Þýskalandi 2010 þar sem Þjóðverjar leika þar sem gestgjafar.

Fyrsti leikur Íslands verður gegn Noregi 13. júlí. Svíar verða mótherjarnir 16. júlí og síðasti leikurinn er gegn Englandi, 19. júlí.

Allir leikir Íslands hefjast kl. 17:00 að staðartíma en búast má við töluverðum hita í Minsk og nágrenni á þessum tíma árs.