Sjónvarpsþættir Jóns Ólafs á sviðið

„Ég hef gengið með þessa hugmynd í maganum í nokkur ár," segir Jón Ólafsson tónlistarmaður. Hann gengst fyrir tónleikaröð í Salnum í Kópavogi sem hann kallar „Af fingrum fram" og byggir á vinsælum samnefndum sjónvarpsþáttum hans. Fyrstu tónleikarnir verða 19. febrúar og er þá gestur Jóns sjálfur Magnús Eiríksson en sérstakur gestur verður söngkonan Ellen Kristjánsdóttir. „Mér datt í hug að færa þetta konsept úr sjónvarpinu og upp á svið. Ég ræði við Magnús og þá með meiri áherslu á tónlistina en ferilinn eins og var í sjónvarpinu. Hvort til dæmis hann hafi ekki fljótlega fengið ógeð á „Ég er á leiðinni" eftir gegndarlausa útvarpsspilun þess lags. En mest verður þetta tónlist en ekki kjaftavaðall."

Af fingrum fram áttu upphaflega að vera sex þættir en urðu sextíu.

Þættirnir hittu beint í mark og Jón hlaut Edduverðlaun fyrir þá fyrsta árið sem þeir voru í sýningu. Jón segir þetta hafa verið hugmynd Jóns Egils Bergþórssonar framleiðanda. Sextíu tónlistarmenn teknir fyrir og voru þá einhverjir eftir? Jón segir nokkra ekki hafa haft áhuga á að vera með svo sem Megas, Stebbi Hilmars og Súkkat. „Já, og svo var alltaf á tali hjá Ragga sót í Skriðjöklunum," segir Jón.

Þegar hafa verið skipulagðir þrennir tónleikar: Aðalgestur 26. febrúar er Magnús Þór og sérlegur gestur er Stefán Hilmarsson og 5. mars er það Valgeir Guðjónsson en þá verður gestur Páll Óskar.

Jón segir að ef fólk taki þessu opnum örmum verði tónleikaröðinni framhaldið. Af nógu er að taka. Forsala er hafin á midi.is og salurinn.is.- jbg