Mayweather Jr. er tilbúinn að mæta Pacquiao

Góður möguleiki er fyrir hendi að draumabardagi margra hnefaleikaunnenda verði að veruleika ef marka má nýlegt viðtali við hinn ósigraða Floyd Mayweather Jr. þar sem hann kveðst reiðubúinn að mæta nýkrýndum WBO-veltivigtarmeistara Manny „Pac-Man" Pacquiao í hringnum.

Mayweather Jr. segir að þrátt fyrir að hann sjálfur hafi öllu að tapa þá sé það Pacquiao sem sé hræddur.

„Sama hvernig litið er á þetta þá er ég í þannig stöðu að ég get ekki unnið. Ef ég rota hann þá munu allir segja að hann hafi verið rotaður áður og ég væri bara að gera það sem flestir bjuggust við því að ég myndi gera. Heimurinn bíður hins vegar eftir því að Floyd Mayweather Jr. tapi í fyrsta skipti.

Pacquiao var spurður þrisvar sinnum hvort hann vildi mæta mér og það eins sem hann gerði var að vísa spurningunni til umboðsmannsins. Ef hann vill raunverulega mæta mér þá þarf hann bara að stíga fram og segja það. Ég gæti alveg þegið stóran peninga bardaga gegn einhæfum andstæðingi," sagði Mayweather Jr. og átti þar við bardagastíl Filippseyingsins.