Magnús: Við klúðruðum þessu bara sjálfir

„Ég veit hreinlega ekki hvernig við fórum að því að missa þetta frá okkur þarna í lokin. Við tókum bara rangar ákvarðanir á lokakaflanum og það vantað að við eldri leikmennirnir í liðinu myndum stíga fram og sýna ábyrð til þess að klára þetta.

Því fór sem fór og við klúðruðum þessu bara sjálfir. Það er ekkert flóknara en það," sagði Magnús Stefánsson sem átti fínan leik fyrir Fram og skoraði sex mörk í 25-24 tapi liðsins gegn FH í N1-deildinni í kvöld.

Magnús segir að þrátt fyrir tapið hafi Fram verið að gera marga góða hluti í leiknum.

„Við erum greinilega búnir að finna baráttuna og leikgleðina aftur. Það er engin spurning og menn voru að leggja sig fram. Þetta er hins vegar súrt því þetta eru töpuð stig sem við ætluðum okkur að taka. Menn verða hins vegar bara að halda áfram því það er enn nóg eftir af þessum vetri," segir Magnús.