Drogba: Hef aldrei verið í betra formi

Þegar áhorfendur sáu Didier Drogba síðast í Meistaradeildinni var hann með skæting við dómarann Tom Henning Övrebo og reif kjaft beint framan í heiminn.

Fyrir það fór Drogba í bann og hann snéri aftur með látum í kvöld. Skoraði tvö mörk fyrir Chelsea og var næstum búinn að tryggja liðinu sigur á Spáni.

Stigið sem Chelsea fékk gegn Atletico dugði þeim þó til þess að komast áfram í keppninni.

„Ég hef aldrei áður á ævinni verið í svona góðu formi. Fyrir nokkrum árum var ég að leika af sama sjálfstrausti en það hjálpar til þegar maður er alveg laus við meiðsli," sagði Drogba í kvöld.

„Það var pirrandi að fá á sig jöfnunarmark í lokin. Við hefðum átt að gera betur og vinna leikinn. Það var annars gott að komast aftur á völlinn. Þar er ég hamingjusamur."