Wenger: Áttum sigurinn skilinn

„Við réðum algjörlega ferðinni í þessum leik en Celtic neitaði að gefast upp. Þó svo við hefðum ráðið ferðinni var vissulega heppnisstimpill á mörkunum okkar," sagði Arsene Wenger, stjóri Arsenal, eftir 0-2 sigur Arsenal á Celtic í Meistaradeildinni.

Arsenal er eftir sigurinn komið með annan fótinn í riðlakeppni Meistaradeildarinnar og hæpið að Celtic vinni 0-3 á Emirates.

„Við bjuggum samt til þessa heppni. Engu að síður þurfti sterkt Arsenal-lið til að vinna. Ef við hefðum ekki leikið vel hefðum við ekki unnið. Við áttum sigurinn samt skilið þó svo það hefði verið heppnisstimpill á mörkunum," sagði Wenger sem telur síðari leikinn ekki vera formsatriði.