Real gefst upp á David Villa

Jorge Valdano, framkvæmdastjóri Real Madrid, hefur staðfest að félagið sé ekki lengur á höttunum eftir spænska framherjanum David Villa.

Real hefur verið að gera hosur sínar grænar fyrir Villa síðan Perez varð forseti á ný. Valencia hefur aftur á móti gert félaginu það ljóst að Villa sé ekki til sölu en hann var einnig orðaður við Man. Utd og Chelsea.

„Málið með Villa er endanlega úr sögunni. Forsetinn okkar talaði við forseta Valencia og þar kom fram að leikmaðurinn væri ekki til sölu. Við berum virðingu fyrir þeirri ákvörðun og erum farnir að leita hófanna annars staðar," sagði Valdano.