Mikilvægur sigur HK á FH

HK vann í kvöld algeran lykilsigur í baráttusinni um að komast í úrslitakeppni N1-deildar karla er liðið lagði FH, 25-23.

Þar með er HK nú einu stigi á eftir FH sem féll niður í fjórða sæti deildarinnar með tapinu. Fram vann sigur á Stjörnunni á útivelli, 33-25, og færðist upp í þriðja sætið.

Fram er með nítján stig, FH átján og HK sautján - öll eftir sextán leiki.

Valur er á toppnum með 21 stig eftir fimmtán leiki en Haukar í öðru sæti með 20 stig eftir fjórtán leiki.

Þá vann Akureyri sigur á Víkingi á útivelli, 25-20. Akureyri er með fimmtán stig í sjötta sæti deildarinnar og á enn möguleika á sæti í úrslitakeppninni.

HK var mun betri aðilinn í fyrri hálfleik í kvöld og var með fjögurra marka forystu í hálfleik, 13-9. FH-ingar byrjuðu að saxa á forskotið eftir því sem leið á síðari hálfleikinn og náðu svo að jafna metin þegar tíu mínútur voru eftir.

Síðustu tíu mínúturnar voru jafnar og spennandi. FH fékk gott tækifæri til að koma sér í góða stöðu þegar tvær mínútur voru til leiksloka. Þá var staðan jöfn, 23-23, og FH-ingar manni fleiri. Hafnfirðingum tókst hins vegar ekki að skora en HK skoraði síðustu tvö mörk leiksins og fögnuðu því dýrmætum sigri.

Valdimar Þórsson skoraði fimm mörk fyrir HK og Ragnar Hjaltested fjögur. Hjá FH var Bjarni Fritzson markahæstur með átta mörk. Örn Ingi Bjarkason kom næstur með fjögur.

Hvorki Aron Pálmarsson né Ólafur Guðmundsson léku með FH í kvöld.