Eiður Smári talar flest tungumál

Heimasíða Barcelona hefur gert skemmtilega úttekt á þeirri skrautlegu tungumálaflóru sem er að finna í leikmannahóp liðsins.

Leikmennirnir 24 í aðalliði Barcelona tala þannig 17 mismunandi tungumál.

Samkvæmt þessu er Eiður Smári liprasti tungumálamaðurinn í hópnum og ku tala átta tungumál.

Fyrir utan heimamennina í Barcelona eru menn frá Mexíkó, Argentínu, Urúgæv, Brasilíu, Frakklandi, Hvíta-Rússlandi, Íslandi, Mali, Fílabeinsströndinni, Kamerún og Mexíkó í aðalliðinu.

Það er vitanlega mikilvægt að knattspyrnumenn geti gert sig skiljanlega á vellinum, en fyrir utan tungumálin sem töluð eru í heimalöndum þeirra, eru leikmenn Barcelona með grunnþekkingu á ensku, ítölsku, þýsku, hollensku, dönsku, serbnesku, króatísku, grísku og nokkrum afrískum tungumálum svo eitthvað sé nefnt.

Alexander Hleb talar stundum rússnesku við Yaya Toure sem lærði tungumálið þegar hann spilaði í Úkraínu.

Rafael Marquez talar stundum ensku við Eið Smára og Thierry Henry því það var tungumálið sem þeir töluðu sín á milli, en talar svo frönsku við afrísku leikmennina og Eric Abidal.

Eins og áður sagði er það Eiður Smári sem er í sérflokki þegar kemur að fjölda tungumála, en hann getur bjargað sér á átta mismunandi tungumálum.

Móðurmálið er íslenskan og þar að auki talar hann ensku og spænsku. Hollensku og þýsku lærði Eiður þegar hann var hjá PSV Eindhoven. Eiður skilur líka katalónsku, frönsku og dönsku - frönskuna lærði hann þegar hann bjó í Belgíu þegar faðir hans Arnór Spilaði með Anderlecht.

Thierry Henry kemur reyndar ekki langt á eftir Eiði Smára, en hann talar fimm tungumál og er farinn að skilja vel katalónskuna.

Næstur kemur Brasilíumaðurinn Sylvinho sem talar ensku og spænsku ofan á móðurmálið portúgölsku og er svo orðinn sæmilegur í katalónskunni.