Halldór Jóhann: Virkilega dapur leikur af okkar hálfu

„Það er lítið hægt að segja eftir svona leik. Þetta var bara virkilega dapur leikur af okkar hálfu. Varnarleikurinn var lengst af þokkalegur en við erum náttúrulega með einhverja 15-20 tapaða bolta í leiknum og það er náttúrulega skelfilega lélegt," sagði Halldór Jóhann Sigfússon, fyrirliði Fram, í leikslok eftir 19-25 tap gegn nýliðum Gróttu í Framhúsinu í dag.

Framarar eru með mikið breytt lið og voru að tefla fram nokkrum ungum og efnilegum leikmönnum en Halldór Jóhann segir að eldri leikmenn liðsins verði að axla meiri ábyrgð en þeir gerðu í dag.

„Það er okkar eldri mannanna að styðja betur við yngri leikmenn liðsins og við gerðum það ekki nægilega vel í þessum leik. Við vorum bara lélegir. Við þurfum bara að slípa okkur betur saman til þess að fá þetta til þess að virka," segir Halldór Jóhann.