Jakob: Ótrúlega skemmtilegur vetur

Jakob Örn Sigurðarson var í mikilli sigurvímu þegar Vísir náði tali af honum rétt eftir leik.

„Ég var ekki hræddur," sagði Jakob en KR vann Grindavík aðeins með einu stigi í oddaleik liðanna um Íslandsmeistaratitilinn, 84-83. „Þeir komu til baka og áttu séns á að taka lokaskotið. Vörnin okkar hélt. Við höfum sýnt það í allan vetur að við erum með góða vörn."

KR var með yfirhöndina strax frá því að Jakob skoraði fyrstu þrjú stig KR í leiknum. „Það er bara erfitt að ætla að stinga Grindavík af. Þetta eru tvö mjög jöfn lið og það sýndi sig að þetta eru tvö bestu liðin á Íslandi í dag."

Áður en Jakob var hrifsaður í burtu sagði hann upplifun sína af tímabilinu í vetur. Hún var einföld. „Þetta er bara búið að vera ótrúlega skemmtilegur vetur. Hrikalega skemmtilegt."