Grindvíkingar fyrstir til að leggja KR

Grindavík varð í kvöld fyrsta liðið til að leggja KR á tímabilinu, liðið vann með ellefu stiga mun 91-80. Um leið náði liðið að minnka forskot Vesturbæjarliðsins niður í tvö stig í Iceland Express-deildinni.

Grindvíkingar voru með 50-44 forystu í hálfleik og þrettán stigum yfir fyrir fjórða og síðasta leikhluta. Þar náðu KR-ingar að saxa vel á forskot heimamanna og spennan var orðin rafmögnuð.

Páll Axel Vilbergsson skoraði glæsilega þriggja stiga körfu þegar um mínúta var eftir og kom Grindavík í 85-78. Þorleifur Ólafsson tróð síðan boltanum í körfuna rétt á eftir og heimamenn fögnuðu innilega. Staðan 91-80 þegar leiktíminn rann út.

Leikurinn var gríðarlega fjörugur og skemmtilegur en vel var mætt hjá stuðningsmönnum beggja liða og íþróttahúsið í Grindavík fullt.

Stigahæstur í liði Grindavíkur var Páll Axel með 20 stig en Þorleifur var með 19 stig. Hjá KR var Jón Arnór Stefánsson með 21 stig en Jason Dourisseau 19.