Mótmæli Ballack að hætti Benny Hill (myndband)

Michael Ballack hjá Chelsea sýndi gríðarlega leikræna tilburði til að mótmæla ákvörðunum dómarans í gærkvöld þegar lið hans féll úr leik fyrir Barcelona í meistaradeildinni.

Ballack hljóp á eftir dómara leiksins yfir endilangan völlinn til að segja skoðun sína á dómgæslunni, en hér var um að ræða eitt tilvik af fjórum þar sem Chelsea vildi fá vítaspyrnu í leiknum.

Eins og venjulega eru menn fljótir að sjá spaugilegu hliðina á málum og nú hafa tilburðir Ballack - og síðar Didier Drogba - verið settir í skemmtilegt myndband á youtube síðunni.

Í myndbandinu má sjá leikmennina sveifla höndum í takt við gamalkunnugt stef úr sjónvarpsþáttum breska gamanleikarans Benny Hill.

Smelltu hér til að sjá myndbandið.