Hilmar Stefánsson, fyrirliði Aftureldingar, var vitanlega hæstánægður með sigur sinna manna á Stjörnunni í kvöld.
Afturelding vann tíu marka sigur á Stjörnunni, 32-22, í Mosfellsbæ þar sem stuðningsmenn heimaliðsins lét vel í sér heyra allan tímann.
„Mér leið eins og ég væri kominn tíu ár aftur í tímann," sagði Hilmar í léttum dúr og átti þar við stemninguna sem ríkti í íþróttahúsinu að Varmá þegar Afturelding var upp á sitt allra besta.
„Nú förum við bara upp og þá fáum við svona stuðning á hverjum heimaleik," bætti hann við.
Afturelding varð í þriðja sæti 1. deildar karla á nýliðinni leiktíð og lagði Selfoss, sem varð í öðru sæti deildarinnar, í undanúrslitum umspilskeppninnar. Stjarnan er eina liðið úr efstu deild í umspilinu og lagði ÍR í sinni undanúrslitaviðureign.
Stjarnan vann fyrstu viðureign liðanna í úrslitum og mætast þau því í hreinum úrslitaleik um hvort liðið leikur í efstu deild karla á næstu ári. Oddaleikurinn fer fram í Garðabænum á mánudagskvöldið.
„Þetta hefur verið misjafnt hjá okkur í vetur en við erum að toppa á réttum tíma," sagði Hilmar. „Við vorum kaldir á móti þeim í upphafi en nú þekkjum við þá betur."
Skyttan Attila Valaczkai meiddist í upphafi síðari hálfleiks og kom ekkert meira við sögu. Hilmar hefur þó ekki áhyggjur af því þótt hann yrði ekki með í oddaleiknum.
„Það kemur maður í manns stað. Þar fyrir utan er pressan öll á þeim. Þeir eru upp við vegg og hafa öllu að tapa - við engu. Við ætlum okkur samt upp og teljum okkur eiga erindi þangað."
