Íslandsmeistararnir verða að vinna í kvöld

Þrír hörkuleikir eru á dagskrá í úrslitakeppnum Iceland Express deildanna í kvöld og þar geta þrjú lið þurft að sætta sig við að fara í sumarfrí ef þau tapa leikjum sínum.

Einn leikur er á dagskrá í kvennaflokki þar sem Íslandsmeistarar Keflavíkur fá bikarmeistara KR í heimsókn, en þar getur KR tryggt sér sæti í úrslitunum með sigri. Liðið hefur yfir 2-0 í einvíginu og því gæti farið svo að Keflavík félli úr leik í kvöld. Leikurinn hefst klukkan 19:15 í Toyota höllinni í Keflavík.

Í karlaflokki getur líka dregið til tíðinda, en þar eru bikarmeistarar Stjörnunnar með bakið uppi að vegg á heimavelli sínum Ásgarði þar sem þeir taka á móti Snæfelli. Snæfellingar hafa yfir 1-0 eftir sigur í fyrsta leik í Hólminum og geta tryggt sér sæti í undanúrslitunum með sigri í kvöld. Leikurinn hefst klukkan 19:15 og verður sýndur beint á Stöð 2 Sport.

Þá verða ÍR-ingar að vinna sigur á Grindvíkingum í kvöld ef þeir ætla sér ekki að fara snemma í sumarfrí. Grindavíkurliðið vann mjög öruggan sigur á ÍR í fyrsta leik liðanna í Grindavík um helgina og fer áfram í undanúrslitin með sigri í Seljaskóla í kvöld. Leikurinn hefst klukkan 19:15.

Vísir verður í Ásgarði og Seljaskóla og fylgist með gangi mála í beinni textalýsingu.