Aron: Mjög hissa á því hvernig við vorum að spila

Aron Kristjánsson, þjálfari Hauka, var ekki par sáttur við frammistöðu sinna drengja sem steinlágu fyrir FH í kvöld, 31-25.

„Ég er mjög hissa á því hvernig við vorum að spila. Ég var að reyna að berja menn í gang en það bara gekk ekki," sagði Aron svekktur.

„Við vorum að gera svakalega mikið af mistökum og það einföldum mistökum. Allan fyrri hálfleikinn í vörninni sem og í hraðaupphlaupum. Sóknarleikurinn var þokkalegur mest allan leikinn en við vorum að klúðra mikið af dauðafærum í seinni hálfleik á Pálmar sem var að verja gríðarlega vel.

„Við vorum ekki nægilega beittir í dag og því fór sem fór."